بە ئامادەبوونی د. خانزاد ئەحمەد ئەمینداری گشتی ئەنجومەنی باڵای خانمان و گەشەپێدان، كۆبوونەوەی نێوان وەزارەتەكان و رێكخراوەكانی ژنان بۆ جێبەجێكردنی بڕیاری ئەنجومەنی ئاسایشی نێودەوڵەتی 1325 و پلانی ئافرەت، ئاشتی، ئاسایش دەستی بەكارەكانی كرد، كە ماوەی دوو رۆژ بەردەوام دەبێت.
ئەم كۆبوونەوانە بە بەشداری نوێنەری وەزارەت و لایەنە پەیوەندیدارەكان و رێكخراوەكانی ژنان و ئاژانسی UN-Women بەڕێوەدەچێت.
تیایدا باس لە رۆلی رێكخراوەكان لە جێبەجێكردنی بڕیاری 1325 و پلانی هەرێمی بۆ جێبەجێكردنی بڕیارەكەو شێوازی بەدواداچوون و هەڵسەنگاندن و پلانی كاری داهاتوو دەخرێنەڕوو.
لە پەراوێزی كۆبوونەوەكەدا د. خانزاد ئەحمەد لە كۆنگرەیەكی رۆژنامەنووسیدا دووپاتی كردەوە: هەوڵ و كۆششەكانی حكومەتی هەرێمی كوردستان بەردەوام دەبن بۆ گەشەپێدانی رەوشی خانمان لە هەموو رووێكەوە، هەروەها بەردەوام دەبین لە جێبەجێكردنی بڕیاری 1325 و پلانی ئافرەت، ئاشتی، ئاسایش، بەهاوكاری لایەنە پەیوەندیدارەكان. ئەم كۆبوونەوانە دوو رۆژ دەخایەنن.