رۆژى یەکشەممە 27،ى شوبات لە شارى سلێمانى، کۆنفراسى نێوان رێکخراوى رۆشنبیرى کۆمەڵایەتى خانزاد بە هەماهەنگىە لەگەڵ رێکخراوى ئێمە بۆ گەشەپێدانى مرۆیى تایبەت بە پرۆژەى هاوبەشى نێوانیان، پرۆژەى بەرزکردنەوەى تواناى تاک و دامودەزگاکان بۆ زاڵبوون بەسەر تووندوتیژى سێکسى و تووندوتیژى لەسەر بنەماى جێندەر لە خێوەتگاى ئاوارەکان و کۆمەڵگەى هەرێمى کوردستان بەرێچووە.
بەئامادەبوونى ژمارەیەک لە دادوەر و بەرپرسى مافى مرۆڤ لە دەستەى سەربەخۆیى مافى مرۆڤ، نوێنەرى بەر ێوەبەرایەتى گشتى بەرەنگاربوونەوەى تووندوتیژى دژ بە ئافرەتان و خێزان، نوێنەرى وەزارەتى کارو کاروبارى کۆمەڵایەتى، نوێنەرى بەشێک لە رێکخراوەکانى مافى ژن و مرۆڤ.
سەرەتاى دەستپێکردنى کۆنفراسەکە وتارى نوێنەرى بەر ێوەبەرایەتى تووندوتیژى دژى ئافرەتان و خێزان لەلایەن، ئارى رەفیق جێگرى بەرێوەبەرى گشتى بەرێوەبەرایەتییەکە خوێندرایەوە، لە وتارەیەکەیدا باسى لە هەوڵەکانى حکوومەتى هەرێمى کوردستان و بەرێوەبەرایەتیەکەیان کرد لە رووبەرووبوونەوەى تووندوتیژى دژ بە ژنان و هەوڵەکانیان بۆ ئاشتەوایى کۆمەڵایەتى و یەکسانى، سوپاسى رێکخراوى ئێمە ى کرد هاریکارییان لە رێگەى راهێنانى کارمەندەکانیان لە پرۆژەى ئاشناکردنیان بە شێوازى کارکردنى هەستیار لەسەر بنەماى جێندەر و یەکسانى لە کەیسەکانى تووندوتیژى خێزان.
پاشان وتارى نوێنەرى وەزارەتى کارو کاروبارى کۆمەڵایەتى خوێندرایەوە، باسى لە هەوڵى وەزارەتەکەیان کرد لە کارکردن بۆ یەکسانى جێندەر لە هەرێمى کوردستان و پلانى وەزارەتەکەیان بۆ ئەو پرسە.
لە بەشێکى دیکەى کۆنفراسەکە وتارى کارین ملۆدۆخ، دەستەى دامەزرێنەرى رێکخراوى هاریکارى ئەڵمانى خوێندرایەوە و تیشکى خستەسەر هەوڵەکانیان لە هەرێمى کوردستان لە سەرەتاى دەستبەکاربوونیان لە کوردستان لە رێگەى پرۆژە و کارى جیاواز بۆ هێنانەدى یەکسانى جێندەرى و بەرەنگاربوونەوەى تووندوتیژى.
لە بەشێکى دیکەى کۆنفراسەکە، وتارى نانسى مومانى/ بەرپرسى ئەرکەکانى رێکحراوى مێدیکل مۆندیال لە عیراق، قسەکردن بوو لەسەر هاریکارى رێکخراوەکان بۆ رووبەرووبوونەوەى تووندوتیژى لەسەر بنەماى جێندەر لە هەرێمى کوردستان.
لاڤە محمد، وتەى سەرۆکى رێکخراوى رۆشنبیرى و کۆمەڵایەتى خانزاد پێشکەشکرد، سەرجەم ئەو چالاکیانەى کەلە ماوەى رابردوو کردوویانە بەشێوەى داتا و وێنەى خرایەڕوو.
وردەکاری پرۆژەى و ئاڵەگارییەکان، لەلایەن فێنک کەمال، بەرێوەبەرى پرۆژەکانى رێکخراوى رۆشنبیرى و کۆمەڵایەتى خانزاد، خرایەڕوو.
بەرێوەبەرى پرۆژەکان لە رێکخراوى ئێمە بۆ گەشەپێدانى مرۆیى، هێژا جەلال لە وتارێکى پوخت و چڕدا بە داتا و زانیارى و خستەڕووى وردەکارییەکان لە رێگەى داتاشۆ وردەکارى پرۆژەکەى خستەڕوو.
لە کۆتایدا د.لوقمان سیوەیلى، سەرپەرشتیارى هەڵسەنگاندنى پرۆژەکە، دەرئەنجامەکانى پرۆژەى خستەڕوو.
لە کۆتای کۆنفراسەکە، بەشداربووان سەرەنج و تێبینیەکانیان خستەڕوو لە پێناو بەرەوپێشبردنى پرۆژەکانى داهاتوو.