سەرلەبەیانى ئەمرۆ 26ـى حوزەیرانى 2022 دامەزرێنەرى میدیکا مۆندیالى ئەڵمانى(مۆنیکا هوسەر) بە یاوەرى وەفدێکى هاورێى لە میدیکا مۆندیال و بەرێوەبەرى رێکخراوى (بەهار عەلى)، (هێژا جەلال) ، سەردانى کەمپى ئیسیان و سەنتەرى شێخانى رێکخراوى ئێمە-یان کرد، بەمەبەستى لە نزیکەوە ئاگاداربوون لە گرفت و کێشەکانى ژنانى ئێزیدی نێو کەمپى ئیسیان لە شێخان، دامەزرێنەرى میدیکا مۆندیال بەپەرۆشەوە گفتووگۆى لەگەڵ ژنانى نێو کەمپەکە کرد لەبارەى رەوشى تەندروستى و دەستڕاگەیشتنیان بە چارەسەرى تەندروستى، بەربەستەکانى بەردەم ژیانیان لە ژیانى ئاوارەیى، رووبەرووبوونەوەى تووندوتیژى و خۆپێگەیاندن و چارەسەرى کێشەکانیان.
مۆنیکا هوسەر، دامەزرێنەرى میدیکا مۆندیال، بەڵێنى بەردەوامى هاریکارى بە ژنانى ئێزیدیى نێو کەمپى شێخان دا لە رێگەى رێکخراوى ئێمە لە پێشکەشکردنى خزمەتگوزارى تەندروستى و خولى هۆشیارى تەندروستى و یاسایى.
ژنانى نێو کەمپى ئیسیان سوپاسى رێکخراوى ئێمەیان کرد کە لە رێگەى تیمى سەنتەرى شێخان لە پێشکەشکردنى هەوڵ و هاوکارییەکانیان بۆ دووبارە دەستپێکردنەوەى ژیان و گوزەران و زاڵبوونیان بەسەر گرفت و کێشەو بەربەستەکانیان.
بەهار عەلى، بەرپرسى رێکخراوى ئێمە، لەنێو ژنانى کەمپى ئاوارەکان لە ئیسیان هیواى خواست هەرچى زووە ژیانى ئاوارەییان کۆتایى پێبێت و بگەرێنەوە ژیانى ئاسایى خۆیان، بەڵێنى هاریکارى بەردەوامى بە ژنانى نێو کەمپەکەدا.