رۆژی ١٠ ی حوزەیرانی ٢٠٢٢، دیداری لێکتێگەیشتنی نێوان رێکخراوی ئێمە و میدیکا زینکا لە بۆسنا کۆتایی بەکارەکانی هێنا بە گفتووگۆی ئەزموون و شێوەی کارکردن لەڕووی مامەڵەکردن لەگەڵ رزگاربووانی دەستدرێژی سێکسی بۆ سەر ژن و منداڵان.
وەفدی کوردستان پێکهاتبوو لە بەرپرسی رێکخراوی ئێمە( بەهار عەلی)، هاودامەزرێنەری رێکخراوی ئێمە( د.بەیان قادر گەڵاڵی)، بەرپرسی کارگێڕی رێکخراوی ئێمە( رووخۆش سابر)، ئەمیداری گشتی ئەنجوومەنی باڵای خانمان و گەشەپێدان( د.خانزاد ئەحمەد)، بریکاری وەزیری کارو کاروباری کۆمەڵایەتی( زەکیە سەید سالح)، راوێژکاری فەرمانگەی پەیوەندییەکانی دەرەوە( سوهام جەبەلی مامەند)، بەرێوەبەری گشتی کاروباری ئێزیدییەکان(سەراب بەرەکات)، وەزیری پێشووی کاروباری شەهیدان و ئەنفالکراوەکان(د.چنار سەعد عبداللە).
لە گفتووگۆی نێوان بەرپرسی رێکخراوی میدیکا زینکا( د.سەبیهە هوسچ)، بە شێوەیەکی ورد و چڕ پلان و ستراتیژی نێوان هەردوولا خرایەڕوو لەوەی چۆن لە داهاتوو سوود لە ئەزموونی یەکتر وەربگرن.
رێکخراوی ئێمە و میدیکا زینکا و شاندی حکوومەتی هەرێمی کوردستان، ئەوەیان خستەڕوو لە داهاتوو کاری زیاتر و هەماهەنگی بکەن بۆ کارکردن لەسەر باشترکردنی رەوشی ژنانی رزگاربووی دەستدرێژی سێکسی کاتی جەنگ و ململانێەکان.
لەماوەی چوار رۆژدا، رێکخراوی ئێمە و رێکخراوی میدیکا زینکا لە بۆسنا، بەهاوکاری میدیکا مۆندیال، سەرپەرشتی دیداری لەیەکترگەیشتن و گۆڕینەوەی ئەزموونی نێوانیان کرد.
بەرنامە و کاروچالاکی چڕ و دەوڵەمەند بۆ دیدارەکە دارێژرا بوو.
